Portrait 4 : Etienne ROUGIER, Occitaniste e passionné de musica
Portrèt 4 : Etienne ROUGIER, occitanista e passionat de musica
Jove auvernhat plan investit dins la transmission e lo partatge d’aquesta lenga, lo CFPO a lo plaser de poder collaborar amb Etienne ROUGIER per divèrsas formacions o estagis. Per descobrir melhor aquesta figura determinanta del mond occitan, vos daissi legir aquelas linhas escrichas per el, que degun melhor que el nos pòt contar son istòria e nos parlar de se
« Originari de Ganhat dins lo nòrd d’Auvèrnhe, e a las pòrtas occitanas, ai estat bressat per la musica, la lenga e las istòrias del Massís Central. Benvolaire dempuèi totjorn al festenal de danças e musicas del mond de Ganhat, me soi rapidament orientat cap a l’antropologia après d’estudis de literatura comparada a Lion e en respondre a de missions al Senegal puèi al Quebèc. Format en lingüistica a l’Universitat de Montreial, m’interessèri a las tematicas ligadas a las lengas en dangièr dins diferentas comunautats autoctònas d’America del Nòrd puèi en Euròpa via, logicament, l’occitan. De la descobèrta d’aquelas situacions etnolingüisticas ricas e variablas, decidiguèri pendent la crisi del COVID de passar de l’autre costat e de trabalhar sul terren. Rejonhèri alara l’aventura Calandreta per me formar a la pedagogia e a la transmission de la lenga, e per participar a la dobertura d’una escòla dins lo « nòrd », a Clarmont d’Auvèrnhe. Me regali uèi a transmetre la lenga a de publics diferents e jos de formas variadas (talhièrs als Brayauds-CDMDT 63, TAP dins las escòlas mairala-primària, ensenhaire a Calandreta, formacions professionalas amb lo CFPO, grops de cants amators, etc.). Vertadièr passionat de las causas perdudas, envisatgi una tèsi a mièja camin entre lo terren e la bibliotèca e a l’entorn de sistèmas comparats de revitalizacion lingüistica per la musica »
Un còp de mai, lo CFPO aurà lo plaser d’aver Etienne coma intervenent pendent las Rescontradas occitanas d’Auvèrnhe que se debanaràn lo 17 – 18 – 19 e 20 de julhet de 2023 a Sant-Bonet-près-Riom (63) al sèti de l’associacion dels Brayauds.
