Estagi de fin d’annada a l’ODT

Lo 20 de decembre passat se debanèt a l’Ostal del Telh un estagi d’occitan animat per Étienne ROUGIER.

La jornada comencèt a l’entorn d’un cafè, amb l’intervencion de Quentin GARNIER, recentament titolat d’un doctorat dins lo domeni de l’occitan ! Ne profitam doncas per li mandar totas nòstras felicitacions e li desiram per la seguida de son percors de bèlas aventuras e tot parièr de capitadas !

La seguida de la jornada se passèt dins la convivialitat e la bona umor. Los aprenents trabalhèron las basas de la lenga occitana gràcias a de pichons exercicis, comptinas… tot en enriquissent lor vocabulari.

L’ensemble dels estagiaris atal coma l’animator aguèron l’escasença de participar a un repais partejat amb los salariats de l’ACEOC, La Descobèrta Occitana, que trabalhan a l’Ostal del Telh. Una pausa meridiana rica en partatge, fòrça agradiva per totes e subretot plan meritada per tot lo mond.

Lo trabalh de diccion èra tanben al programa gràcias a un exercici de lectura sus un tèxte d’A. VERMENOUZE. Un article sus l’annada 2022 atal coma los vòts per l’annada 2023 foguèt confeccionat pels aprenents amb l’ajuda preciosa d’Etienne.

Una discussion sus l’utilizacion de la lenga occitana e l’escambi d’idèas sus una possibla armonizacion d’aquesta darrièra venguèt clavar aquela polida jornada.