Portrèt 5 : Quentin GARNIER, doctor en occitan

Uèi, avèm decidit de començar la presentacion dels intervenents de las Rescontradas occitanas d’Auvèrnhe amb lo portrèt d’un jove doctor en Estudis Occitans, Quentin Garnier !

Pendent tota son enfança, Quentin ausiguèt parlar aquesta lenga. Una lenga que cerquèt de descobrir mai de prèp, çò que lo menèt, a pas que 18 ans, a l’aprendissatge de la lenga occitana, d’en primièr dins d’associacions occitanas, puèi amb sa familha e mai que mai amb son grand-òme.

Per nòstre doctorand, çò que noirís la passion per aquesta lenga, es sustot sa sonoritat, sa musicalitat e tanben la poesia que permet de crear.

Aquesta lenga es pas gaire presenta dins lo mitan professional de fòrça mond, mas per Quentin, aquò es plan luènh d’èsser lo cas. En efèit, la lenga es al centre de sa vida professionala, pr’amor que constituís l’objècte d’estudi principal de sas recèrcas. Es tanben plan presenta dins sa vida personala, que la parla, l’escota, la legís e l’ensenha tre que l’escasença se presenta.

Perqué l’occitan es important per tu ? Es una question delicada, ai totjorn de mal a i respondre… Cresi, entre autras causas, que aquesta lenga me rapròcha intimament de totes mos grands e que me liga als territòris que me son familiars e que m’agradisson particularament.

Aquesta annada encara, aurem lo plaser d’aver Quentin GARNIER a las Rescontradas occitanas d’Auvèrnhe 2023 ! Òc-ben… farà partida de l’equipa dels nombroses intervenents d’aquesta edicion, que animarà cada jorn los corses de lenga occitana generala e presentarà una conferéncia sus l’istòria de la lenga occitana lo dimècres 19 de julhet !

Alara doblidetz pas de vos inscriure per descobrir aqueste jove doctorand e sas intervencions, totas mai passionantas e interessantas las unas que las autras !!!!