Portrèt 6 : Lucas Martin POETTO

Aquel joven italian de la region del Piemont aprenguèt l’occitan dins un encastre plan viu, que l’aprenguèt dins lo cercle familial. O poguèt tanben descobrir a travèrs la musica, lo cant e la dança. Uèi evoluís dins un encastre ont la lenga es omnipresenta, que viu dins un contèxte a l’encòp italian, occitan e francés.

Quand nos parla de l’occitan, evòca las discussions entre amics, que se fan naturalament. En efèit dins aquela region, l’occitan es una lenga que ten encara una plaça importanta, çò que fa que lo mond lo parlan encara fòrça e de faiçon naturala entre eles.

Li mancava totun un element ! La lenga en Itàlia se tròba fòrça dins d’encastres orals, cerquèt doncas d’estudiar per l’aprene a legir e a escriure. Se virèt alara cap a d’associacions culturalas de las valadas del Piemont, amb las qualas collabora encara uèi.

Se li demandatz çò que li agrada dins la cultura occitana, vos respond « tròbi subretot interessant aquela cultura locala e a l’encòp globala, que traversa los tempses e las frontièras en creant de ligams entre las personas novèlas e originalas ».

Per primièr còp aquesta annada ! Òc-ben ! es lo pichon novèl del CFPO Montanhòl, aurèm, per nòstre mai grand plaser, la chança d’aculhir Lucas a las Rescontradas occitanas d’Auvèrnhe 2023, que i animarà un talhièr atal coma una conferéncia !!!